عــادى جـداً
مَرة أبيَض ... مَرة إسوِد
مَرة يبقى الكون رَمادى
كُلُه عادى
يوم بَكون مَجنون و طايش
يوم بَكون عاقِل و هادى
اليومين بيفوتوا .. عادى
بفتِكِر تَفاصيل طفولتى
و انسى مين زارنى الليلة دى
حتى لو افتكَرتُه .. عادى
ناس بتيجى تجُر شَكَلى
و يقولولى انت اللى بَادى
بس بهاوِدهُم و عادى
ناس بَكون عايش عَشانهُم
مايشوفوش فَرق فى حَياتهُم
بين وجودى و بين بُعادى
مش بَلومهُم بَردو .. عادى
لما نِبقى اتنين أحِبَة
و فـ ثَوانى نكون أعادى
مش هَنِخسَر حاجَة .. عادى
مَهما يِعلا المُوج عَلَيا
بَردو يِفضَل قَلبى راضى
و كُل مَرَة يقولى "عادى" !
كُل يوم بيفوت عَلَيا
نِفسى أحَقق فيه مُرادى
و اللى مش مَكتوبلى اشوفُه
مش هَقاوِح يَعنى .. عادى
تايهَة مِنى حاجات كتيرَة
مش بَشوفهُم حَتى لَما
يبقوا ع الرَصيف قُصادى
مش هَشوفهُم ؟؟!!
عادى .. عادى
ببقى واقِف جَنب حِلمى
لَو بعِلو الصوت بَنادى
مش بيِسمَع .. بس عادى
حَتى لَما بَفَكَر اكتِب
مِش بَلاقى كَلام يعَبَر ع اللى بِيا
فَجأَة ألاقى دماغى فاضِى
و الكَلام بَقى كُلُه عادى
منقول "مما اعجبنى "